Ung- og smábarnavernd

 

Markmið ung- og smábarnaverndar er að fylgjast reglulega með heilsu og framvindu þroska barna frá fæðingu til 6 ára aldurs ásamt því að veita foreldrum stuðning þannig að börnunum séum búin bestu mögulegu uppvaxtarskilyrði á hverjum tíma.

Heimavitjanir

Boðið er upp á heimavitjanir fyrstu vikurnar eftir fæðingu barns og í kjölfarið skoðanir á heilsugæslustöðinni. Fljótlega eftir að fæðing hefur verið tilkynnt heilsugæslunni hefur hjúkrunarfræðingur samband við foreldri til að kynna þjónustuna, finna tíma fyrir heimavitjanir og veita foreldrum stuðning eftir þörfum varðandi umönnun barnsins og líðan sína.

Heimsóknir á heilsugæsluna

Þegar barnið er 4 vikna gamalt er boðið upp á fyrstu heimsókn til hjúkrunarfræðings á heilsugæslunni. Sá hjúkrunarfræðingur sem sinnti ykkur í heimavitjunum tekur að öllu jöfnu á móti ykkur á heilsugæslunni til að stuðla að samfellu í þjónustunni. Gott getur verið að skrifa hjá sér spurningar sem vakna fyrir heimsóknir á heilsugæslustöðina. Við þriggja mánaða aldur hefjast bólusetningar.

Fyrirburar

Heilsugæslan sinnir ung- og smábarnavernd fyrirbura sem fæddir eru fyrir 32 vikna meðgöngu og/eða ef fæðingar þyngd er undir 1500 grömmum. Markmið þjónustunnar er að fylgjast reglulega með heilsu og framvindu þroska barnanna. Hjúkrunarfræðingur fyrirbura fer í heimsókn til fjölskyldunnar á Vökudeild Landspítalans og  heimavitjun fljótlega eftir útskrift barnsins af sjúkrahúsinu. Foreldrar eru beðnir um að hafa samband við hjúkrunarfræðinginn við útskrift af vökudeild. Fjöldi heimavitjana fer eftir þörfum hverju sinni  og fyrsta heimsókn á heilsugæslustöðina fer eftir aldri barnsins og hvenær barnið er í eftirliti hjá nýburasérfræðingum vökudeildar.